Hari Minggu, 12 november 2006, ada acare halal bi halal
KRLmania di lapangan monas. Berhubung si irfan kakinye lagi luke-luke, jadinya berangkat ke sono cuman ama Raissa doang. Si irfan sih sempet ngamuk-ngamuk maksa pengen ikut, karene die pengen banget naek kerete ke Monas, tapi daripade kakinya makin pareh, akhirnya die mau juge ditingal setelah dijanjiin mau dibeliin kapal-kapalan yang besar nanti.
Ya udah, akhirnye sukses berangkat ke Monas berdue aje ame Raissa. Dari Depok Baru kite naek
KRL ekonomi. Keretenye sih kosong, tapi udeh gak ade tempat duduk. Lumayan juga berdiri sampe Pasar Minggu sambil gendong Raissa. Mana si Raissa kadang gak mau digendong, pengennye jalan-jalan di dalem gerbong.
Akhirnye kerete mendarat di Gondangdia. Dari Gondang kite naek bajaj (kite termasuk golongan 'jablay' neh, alias jarang naek bajay). Acarenye mulain jam sembilan pagi. Lokasinye gak jauh dari gerbang masuk monas, yang deket pangkalan delman.
Sampe di lokasi, si Raissa seneng banget. Kali karene di ruang terbuka, di lapangan yang luas dan banyak anak-anak pade maen layangan.
Die gak bise diem banget. Pengennye jalan-jalan keliling lapangan. Pernah pas kite lagi asyik ngobrol, tibe-tibe die ngilang. Ternyate die ngejar delman yang banyak di sekitar lokasi. Tangannya nunjuk-nunjuk ke arah delman yang seliweran. Kayaknye sih die pengen naek delman ntu. Biar die gak tambah bete, akhirnye beli layangan aje. Eh ternyate die bise lho naekkin layangan ini, sambil lari-lari keliling lapangan.
Jam 12.30 tepat, setelah bertemu dan ngobrol-ngobrol dengan temen-temen yang laen, termasuk juga dengan kepala humas PT KA, Ahmad Sujadi, akhirnye kite pun siap-siap puang ke rumeh masing-masing. Dari Monas naek Taksi ke Gondangia. Dari Gondang nyambung
KRL lagi ke Depok. Puas deh Raissa hari itu naik
KRL, mana
KRL ekonomi lagi.
(photo courtesy of dian)