Koempoel BA di Palembang

Sesuai jadwal, tanggal 25 Oktober kemaren, member milis BA yang mudik ke palembang pada ngumpul di KFC palembang square, jam 14.00.

Kebetulan waktu itu dari pagi abis muter-muter lebaran ke rumah sodara di seputar palembang. Jam 14 tepat kite sampe di Palembang Square terus langsung ke KFC.

Ini mal yang kalo hari biase sepi banget, hari itu penuh ama lautan manusia. Kebanyakan anak-anak yang pade jalan-jalan sambil belanja-belanji, karene di sini ada Carefournya.

Sampe KFC..., walah.., penuh banget. Mo masuk aje susah bener. Di dalem juga kayak kagak pake AC. Panas. Padahal kayaknye AC-nye nyala. Mungkin karena banyaknya manusia di dalemnye, jadi hawa dingin pade kesedot semue.

Antri pesen makannye juga sampe berjejer panjang. Umminye irfan yang antri pesen makan buat irfan dan Raissa. Raissa kayaknye udeh agak-agak gelisah nih. Mungkin karena kepanasan same pusing ngeliat orang sebanyak itu di ruang yang gak seberape luas.

Nggak lame dateng pak Herman ame due balitenye. Terus Pak Monang Tampubolon ame Yasmien-nye. Sementare bu Fidia kayaknya masih di rumeh. Lagi masih banyak tamu katenye. Karene kayaknye suasane di dalem KFC semakin panas udaranye, akhirnye kite semue cabut ke luar. Ngumpulnye di depan pintu masuk KFC, di lobby mal, yang lumayan agak luas.

Sebentaran nunggu, akhirnye datenglah bu Fidia sekeluarge. Akhirnya 'gathering' BA di palembang tahun ini bis mempertemukan empat keluarge. ALhamdulillah.., bise saling ketemu langsung di darat di hari yang berbahagia ini.

Lebaran di Palembang

Di Palembang, Lebarannye hari Selasa, 24 oktober 2006. Alhamdulillah kemaren itu bise sampe sono, nyusul Irfan, Raissa dan Umminye hari senen, 23 Oktober 2006.

Selasa pagi, kite semue siap-siap sholat Ied di Mesjid deket rumah. Si irfan dari pagi udeh siap pake baju baru. Raissa bangun agak belakangan, tapi tetep semangat pas diajak Sholat.

Raissa ikutan jalan kaki menuju Mesjid. Jalannye 'gagah' banget. Pas udeh agak jauhan, karena kasian takut capek, akhirnye digendong.

Abis Sholat kite kumpul di rumah. Pempek dan kawan-kawan sudah menanti. Abis itu siap-siap 'jalan-jalan' keliling buat berlebaran.

'Terdampar' di Merak 15 Jam

Tanggal 21 Oktober kemaren adalah waktunya untuk nyusul Irfan cs yang udeh mudik duluan ke Palembang.

Karena sendirian, nyantai aje berangkatnye. Rencanenye sih mo estafet naik Damri dari gambir langsung ke Stasiun Tanjungkarang Lampung, terus lanjut pake kerete ke Palembang.

Waktu itu Damrinye berangkat dari Gambir jam sepuluh malem. Di jalan lancar banget jadi bise sampe Merak sekita jam 00.30 dini hari.

Eh di Merak, ini bis kagak bise bergerak masuk ke kapal Ferry. Malem ntu bener-bener puncak mudik orang yang pade mo ke Sematera via darat. Ribuan mobil, motor, dan bis pade ketahan semua di pelabuan dan di jalan-jalan menuju pelabuhan.

Kirain ketahannya sebentaran doang, sampe masuk ke dalam kapal karena bis udeh masuk wilayah pelabuhan, tapi ternyate oh ternyate..., sampe pagi, siang dan sore ini bis kagak masuk-masuk juge ke dale Ferry.

Bayangin, nginep di dalem bis, di pelabuhan. Untung aje bisnye pake AC dan kursinye bise buat tidur. Gak kebayang dah kalo bisnye zonder AC, kayak bis ALS di sebelah tuh, penumpangnye pade kegerahan semua. Pade buka baju dan balitenye pada nangis kejer semue karene kepanasan.

Untung cuman sendirian neh. Untung juge bawa bekel minum lumayan banyak, karene kalo beli-beli di jalan pasti hargenye gile-gilean. Pagi itu sahur cuman minum teh kotak ame susu ultra plus air putih. Makannye cukup sebungkus Chitato.

Menjeang jem 4 sore, hari Minggunye, baru dah ini bis perlahan-lahan dapet giliran masuk ke dalem kapal Ferry (Gile.., berarti ketahan hamir 15 jam lebih neh. Ampun dah). REncananya mo naik kerete hari Minggu pagi dari Tanjung karang sepertinye gak kesampean.

Sampe bakauheni udeh jam enam sore. Kayanye kerete malem juga bakal gak kekejar neh. tanye-tanye ame temen sebelah, yang kebetulan orang Lampung, katenye kayaknye gak bisa ngejar kerete malem. Die nyaranin naek travel aje dari deket stasiun. Di sono banyak travel tujuan ke palembnag katenye. Ya udeh.., pasrah aje dah. kalo gak dapet kereta naik travel. Kalo travel kagak ade ya palingan nginep di Lampung terus lanjut besok paginye.

Tepat jam sembilan malem ini bis mulain sampe Stasiun Tanjung Karang. Ahamdulillah.., lampu di dalem stasiun sepertinye masih nyae tande masih ade erete yang mangkal. Langsung begitu turun dari bis buru-buru lari ke dalem stasiun. Sampe di loket ade tulisan "Kursi abis di kelas bisnis". Akhirnye beli tiket yang kelas eksekutif harge 95 ribu. Alhamdulillah.., itu kerete masih ade kursi kosongnye yang di kelas eksekutif.

Kerete berangkat jam sepuluh malem (padahal di hari-hari biase jam sembilan udeh cabut nih). Untung tempat duduk sebeleh kosong, jadi bisa agak legaan duduknye. Keretenye juge bagus, kayak kerete argo Bromo yang ke surabaya ntu.

Saking capeknya, gak lame kerete jalan langsung pules. bangun-bangun jem 03.30. Wah waktunye sahur neh. Sayangnye belom sempet pesen makanan ke pramugarinye. Ya udeh, daripade lama lagi nunggu akhirnye bongkar-bongkar tas bekel di jalan. ALhamdulillah masih ade stok teh kotak dua biji dan Chitato dua bungkus , plus donat sepotong ama snack jatah penumpang.

Menjelang lewat stasiun Baturaja, ada penumpang yang duduk di sebelah. Sampe Prabumulih udeh jam tujua pagi lewat. harusnye dari Prabumulih ke Palembang cuman due jam kurang, tapi hari itu kereta baru mendarat di Palembang jam 10.30, karena sering berenti-berenti di tengah jalan. Maklum, jalur kerete di sono cuman satu jalur.

Jam sebelas lewat, hari Senin 23 Oktober 2006, sampelah akhirnye ke rumah mertua di palembang. Alhamdulillah.., selamet kagak kurang ape-ape. Bener-bener pengalaman mudik yang 'fantastis' neh. Seumur-umur baru hari itu ketahan di Pelabuhan sampe belasan jam.

Lebaran countdown

Irfan, Raissa dan Umminye sekarang udeh di Palembang. Kebetulan udeh pade libur jadi langsung aje berangkat. Daripade nunggu deket-deket lebaran, bakalan puyeng di jalan karene banyak orang juge pade mudik.

Si Raissa katenye badannye agak anget-anget nih di palembang. Kemaren katenye dibeliin sepatu baru warna pink terus langsung dipake gak mau dilepas-lepas. Walhasil katenye kakinye pade bengkak-bengkak. Irfan juga dibeliin sepatu baru, sepatu kulit katenye.

Kalo urusan beli membeli, ini anak due emang bede-bede sifatnye. Si irfan mah kalo dibawa ke toko palingan bilang gini, "Emang irfan diajak ke sini mau ngapain..?". Dia juga nggak pernah ambil sendiri barang yang die pengen. Nggak pernah ngambil barang terus maksa minta dibeliin. Harus kite yang 'aktif' nawarin ke die. Kalo nggak sesuai ame keinginan die ye die nggak mau. Kalo udeh cocok baru die ngangguktanda setuju dibeliin.

Nah adeknye laen lagi. Die ini 'pecicilan' banget. Begitu dilepas di toko (jalan di lantai, Red). Langsung deh melesat kayak peluru abis ditembak. Lari lah die keliling-keliling cari barang. Kalo ade maenan yang die suke, langsung diambil terus harus dibeli. Kalo nggak dibeli dijamin ngamuk-ngamuk di toko. Kalo maenan udeh dipegang, suseh banget dah ngelepasinnye, kecuali ada barang laen yang die suke lagi.

Raissa ikut Shalat Shubuh

Raissa yang setiap waktu sahur selalu ikutan bangun, Shubuh tadi ikutan Shalat di Masjid deket rumah.

Lucu juga lihat die pake kerudung, jaket, terus jalan kaki ke Mesjid yang lumayan jauh buat ukuran anak batita kayak die eni, di tengah jalan yang masih rada-rada gelap. Jalannye semangat banget. Langkahnye tegap sambil tangannye minte dipegangin sepanjang jalan.

Sampe Mesjid die berdiri di samping. Nggak mau duduk sampe Shalat selesai. Sempet kuatir juge kalo-kalo die pipis karene kelupaan makein pampers sebelum berangkat tadi.

Seneng banget die dibawe ke mesjid. Selesai Shalat die pengen lari-lari ke arah tangga. Karene Mesjid ini tempat Shalatnya di lantai due, jadi emang kudu ekstra hati-hati kalo bawa anak kecil. Untungnye juge die nggak rewel (dan nggak pipis, hehehe). Ini pertame kalinye die diajak ke Mesjid, shubuh- shubuh pule. Kalo abangnye sih udeh sering diajak ke Mesjid itu.