Bazaar Cubitus dan Snoopy

Inget baju Cubitus n Snoopy, inget irfan n Raissa di rumeh. Secare babenye yang lokasi gawenye nggak jauh dari pabrik baju anak2 ini, tiap kali ada bazaar murah di sono pasti dah dibela-belain buat dateng. Kalo mo ke sono emang baeknya jangan jem istirahat, karene dijamin bakal penuh n kagak bisa milih-milih dengan tenang.

Menjelang lebaran eni, Pabrik Snoopy n cubitus lagi-lagi mau bikin bazaar. Bazaar mulain tanggal 2 sampe 13 oktober 2006. Hari Sabtu dan Minggu tutup. Yang dijual katenye sih baju-baju (buat anak-anak, balita, batita, dan bayi), accecories dan toys. Katenye diskonnye ampe 70 persen. Pengalaman yang kemaren-kemaren sih, emang banyak yang dijual mureh. Ade yang flat hargenye, ade juge yang sistim diskon.

Oiye lupe. Lokasinye di Kawasan Industri Jababeka (Cikarang Industria Estate), jalan Jababeka V blok F5, Cikarang, Bekasi. Kalo dari Komdak nih, naik aje Bis Mayasari P.121 (Blok M - Cikarang). Turun di Jababeka, terus naik ojek. Bilang aje ke Snoopy. Bayarnye 3 ribu. Kalo bawa mobil pribadi, via tol Cikampek keluar di pintu Cikarang Barat (Lippo cikarang) terus ambil kiri arah ke Jababeka. Kalo naek KRL, turun di Stasiun Cawang, terus naik bis ke halim (yang banyak bis mau masuk tol cikampek), Naik angkot EF K-59 jurusan jababeka cikarang. Turun di Jababeka terus naik ojek.

Kalo mo ke sono, kayaknya musti siapin uang lebih. Soalnye kadang kite suke nafsu saking liat banyak barang bagus harge miring. Udeh gitu, di sono kagak terime kartu kredit. ATM juge lumayan jauh.

Malu Bertanya Sesat di Jalan

"Kalo orang udah mati emang pergi ke langit...?"
"Terus nanti bumi dihancurin ya ?"
"Habis itu, Buminya dibikin lagi ama Alloh..?"
"Nanti yang udah mati pada pergi ke mana..?"

Itu sebagian pertanyaan-pertanyaan Irfan kalo tibe-tibe die lagi inget. Die ini emang 'pemerhati' masaleh bumi dan tata surye, dikombinasiin ame masalah akherat. Demen banget kalo udah disetelin CD tentang tata surye dan bumi ini. Seneng kalo udeh liat-liat gambar planet sambil dengerin keterangannye baek-baek.

Perneh juge die ngmong gini,
"Gempa bumi itu apaan sih..?"
"Kalao ada gempa irfan lari keluar..?. bawa adek..?"
"Tapi ntar kalo lari ke luar jalanan pada belah,"

Puasa Sampai Jam Sebelas

Hari kelime puase ini, kebetulan juge hari kedue si irfan masuk sekoleh lagi, die puase sampe jam sebelas. Kemaren die nggak sekoleh (TKIT Cahaya Ananda) karene dibangunin kagak bangun-bangun. Jem sepuluh pagi baru melek nih anak.

Tadi pagi berangkat sekoleh nggak sarapan. Bekel makan juge nggak dibawe karene emang dilarang awe makanan minuman di bulan puase ini ame sekolehnye. Wahasil katenye die kagak makan dan minum di sekolehnye.

Pulang sekoleh jem sebelas, begitu sampe rumah langsung teriak-teriak minta minum. Minta susu, es teh, dan es sirup. Aus berat kali die ye. Lumayan ah, latihan puase sampe jem 11. Mudah-mudahan lain hari bisa setengah hari, terus full.

Naik Kereta ke Palembang..?

Stasiun Kertapati Palembang, adalah stasiun terakhir kereta lintas Bandar Lampung- Palembang. Di sini lah ujung rel itu berada. kalo di Jakarte, mirip-mirip ame Stasiun Beos dah. Kerete yang ke sono ade beberapa jenis. Ade kerete ekonomi (kerete rajabasa), yang cuman 15 ribu tiketnye, terus ade yang kelas bisnis yang tiketnye 40 ribu, lalu juge ade kerete Eksekutif (Sriwijaya/ Fajar Ekspres) yang jadi satu ame kelas bisnis, tiketnye 80 ribuan.

Kalo mo naek kerete ke Palembang sih mending naek yang eksekutif aje. Keretenye interiornye mirip-mirip kerete Argo Bromo, Full AC terus dijamin bise tidur pules. Soalnye nih ye, yang namenye kerete ekonomi (Rajabasa), ini kerete warnenye mereh, keretenye suke ditahan di mane-mane. Suke-suke yang nahan. Kadang di stasiun kecil, sering juge di tengeh sawah.
Jalur ke Palembang khan dilewatin ame yang namenye kereta BABARANJANG (batu bara rangkaian panjang), jadinya semue kereta yang lewat kudu antri. Mane jalurnye cuman satu lagi kagak kaye rel Jakarte Bogor yang udeh dobel trek. Kerete babaranjang ini panjangnye ampun-ampun dah. Bisa belasan gerbong satu setnye. Kebayang khan kalo kite di sini aje kite kesel banget kalo disruh nunggu Pakuan lewat, padahal ini KRL ekspres palingan cuman lapan gerbong.

Nah apesnye , kerete ekonomi kalo pagi itu kudu sabar nungguin kereta yang laennye lewat. Mane panas-panas lagi. Pokoknye kagak jelas dah kapan eni kereta bakal sampe Palembangnye. Kerete Eksekutif sih mendingan. Ditahannye cuman kadang-kadang aje. Udeh gitu kalo ditahan di jalan juga kagak terlalu berase karene di dalem adem, jadi bisa nyaman liat-liat pemandangan di luar sono

Tapi sayangnye, biasenye jumleh kursi kereta eksekutif eni terbates. Soalnye palingan cuman ade dua gerbong yang disambung ame gerbong kelas bisnis. Kelas bisnis kagak pake AC. Bedanye bisnis ame AC ya cuman die ikutan lebih cepet karene digandeng ame eksekutif, terus plus ade kipas anginnye.

Kalo mo naek kerete ke Palembang pagi-pagi, berangkatnye kudu malem dari Jakarte. Biasenye naeik DAMRI dulu malem-malemnya, jam sepuluhan dari Gambir. Ini bis sampe Stasiun Tanjung karang Lampung. Tiketnya hampir seratus ribuan seorangnye. Sampe sono biasenye pas shubuh. Sholat aje dulu di mesjid depan stasiun, terus siap-siap antri tiket. Keretenye berangkat jam 8 pagi. Sampe Palembang kire-kire jam tujuh malem.

"Asyiik..,Pulang Kampung.."

"Asyik.., pulang kampung," begitu teriak si irfan pas tau kao lebaran besok kite mo mudik lagi ke Palembang. "Naik Lorena aja ya...". "Nggak bisa. Nanti irfan , ummi ama adek berangkat duluan. Naik pesawat aja. Naik bis repot Ummi sendirian," kata umminya. "Ya udah naik pesawat. Asiiikkk..", kate irfan kegirangan.

Ini anak emang paling hobbi banget 'travelling'. Ke Palembang udeh beberape kali naek semua jenis kendaraan. Dari mulain naek bis, mobil travel, kereta yang dari Lampung, sampe pesawat die jabanin. Di jalan juge die alhamdulillah kagak pernah mabok. Kayaknye menikmati perjalanan banget. Bis favoritnye kalo ke Palembang ya Lorena itu. Die seneng naik bis karene kalo naek bis die bise naek kapal Ferry nyebrang selat Sunde.

Khan heboh banget tuh, sore-sore naik kapal Ferry sambil liat laut n gunung Anak Krakatau. Kalo udeh naek Ferry sebenernye kite males turun ke kapa. Pengennye di dalem bis aje. Tapi biasenye die teriak-teriak minta turun terus naek ke atas kapal.

Kalo naek peswat juge die anteng. palingan nanye-nanye kalo die liat sesuatu di luar jendele. Mulutnya ntu emang kagak perneh diem. Ape aje die tanyain. Nah kalo Si Raissa, di jalanan jua anteng. palingan mimik ASI, sambil sesekali ngikutin abangnye ngelongok di jendele.

Lebaran taun eni emang insya allah kite mo mudik lagi ke Palembang. Kasian kakek neneknye irfan di sono, Umminye irfan khan anak satu-satunye, jadi kalo kite nggak mudik, bakalan pade kesepian.

Ramadhan Ceria

Hari kedue Ramadhan ini, si Irfan masih belom mau bangun sahur. Sementare adeknye begitu denger 'kegiatan' sahur berlangsung, sontak bangun terus ngacir ke lokasi. Sampe lokasi die nggak ikutan makan sahur, palingan cuman tidur-tiduran sambil dipangku. Tauk nih, si Irfan masih belom mau bangun sahur juga, padahal ude dibangunin jungkir balik.

Tapi biasenye, kalo pagi-pagi die bangun terus ditanyain puase ape nggak, die bilangnye puase. Emang sih sempet nggak sarapan. Tapi jam sepuluh die minte susu segelas. "Katanya puasa.?", "iya puasa, tapi irfan haus neh..", jawabnya.

Nah si raissa biasenye nemenin kite yang lagi saur. Tau nih anak ye. Die otomatis bangun pas kite lagi sahur. kaya ade alarmnye aje, hehhehe.

Malemnye irfan ikutan Tarawih, walaupun lebih banyak main ama temen-temennye, daripade ikutan shalat. Tapi beruntung, panitya Ramadhan RT udeh nyiapin kegiatan Tarawih buat anak-anak. Abis Shalat mereka pade dapet bingkisan snack. Semalem irfan nggak dapet bingkisan ntu karene die ikutannye tarawih bapak-bapak. "Koq irfan nggak dapat kue...?". tanyanye. "Makanya, irfan besok puasa, biar maemnya dapet hadiah." "Emang kalo nggak puasa nggak dappet..?". "ya nggak lah.". "ya udah.., besok ifan puasa dah."

Ciater......

Sabtu kemaren, 16 September 2006, kite sekeluarge jalan-jalan ke Ciater, Subang. Kalo nggak saleh, sekitar 160 KM dari Cawang, hehehe.

Berangkat dari rumah jam 07.00, via tol Cikampek dan Cipularang. Keluar di pintu tol Sadang terus ke arah Kote Subang. Jauh juge ye ternyate. Dari Kota Subang aje masih 50-an Km lagi kire-kire. Udeh lama juge nggak perneh ke sono lagi. Dulu terakhir ke sono pas masih bujangan, kyenye taun 1997-an. Alhamdulillah, akhirnye sampe lokasi pas waktu Dzuhur, sekitar jam dua belas siang.

Sampe sono langsung cari lokasi gelar tiker, di deket pemandian air panasnye. Oh iye, masuk ke lokasi sari Ater bayar tiket 10 ribu. Anak umur di bawah lima tahun bayar separo. Raissa gratis (soalnye masih digendong).

Lokasi lumayan rame, karene baru aje rombongan, entah dari mane, pade berdatengan pake beberapa bis.

Irfan seneng banget pas diliatnye banyak orang pade nyemplung di air panas di bawah sono. Oia.., sayangnye ye di lokasi ini banyak mafia 'tiker'. Mereka nyewaiin tiker-tiker dengan harge fantastik. Payanye lagi, mereka udeh gelar tiker-tiker mereka ntu di hampir semue lokasi. jadinya mau nggak mau, kite kudu nyewa ame mereka.

Selesai istirahat sebentar, si irfan langsung ngajakin nyemplung di air panas. Seneng banget die bise berendem di situ. Adeknya juga. Walaupun mulenye die takut pas tau airnye panas. tapi lame-lame jadi biase juge dan teriak-teriak kegirangan. Irfan sempet lame mangkal di air terjun mini, yang airnye panas juge.

Puas berendem ame jalan-jalan bentar, akhirnye pas jam empat sore kite siap-siap cabut. Nggak lupe juge beli nanas delapan biji. Satunye 2500 perak. Peuyeum juge nggak ketinggalan dibeli buat oleh-oleh. Sampe rumeh sekitar jem delapan malem. Selame di jalan, irfan ame adeknya kagak mabok. Irfan demen banget liat-liat jalan. Adeknya sukses pules sampe Jakarte. Nah, Umminye nih malah yang mabok. Kali kecapean karene malemye begadang nyiapin makanan yang mo dibawa.

Hore.., Bentar Lagi Puasa

(tuh .., si irfan lagi 'mujur', dipangku ame wakil walikote depok. Di sebelahnye walikote depok n isteri)

Sebentar lagi bulan suci Ramadhan mo dateng. Mudah-mudahan kite semue bise masuk ke dalem Bulan yang suci dan penuh berkeh eni ye. Umur siape yang tau ye sih ye. Ade temen atawa tetangge kite yang taun kemaren berpuasa same-same kite, taun eni mungkin udeh pade nggak ade.

Insya Allah nanti si irfan mo nyobain puase di bulan Ramadhan. Semoga die bise bertahan, minimal setengah hari dah. Walopun Kalo diperhatiin sih, sekarang eni die lagi 'gembul-gembul'nye kalo urusan makan.

Kalo mo masuk bulan puase gini, gue jadi inget jaman kecil dulu di Kalibate. Pagi-pagi abis saur langsung keliling kampoeng nyari kembang duren. Sampe rumah kembang duren dimasak buat menu buka. Sering juge cari daun cincau terus dibikin es cincau pake air gula jawa. Sllrrrpp.., nikmat.

Malemnye abis taraweh biasenye juge jalan-jalan keliling kampoeng, sambil bakar petasan. jaman dulu mah petasannye gede-gede. Kadang kite perang petasan ame anak-anak laennye.

Allaahumma baariqlana fissya'ban, wa balighna Ramadhan.
Ya Allah.., berkahilah kami di bulan Sya'ban ini dan sampaikanlah kami ke bulan Ramadhan.
Amien....

Mie Ayam Tugu

Mie ayam tugu, salah satu tempat makan favorit kite karene lokasinye yang kagak jauh dari rumeh, dan..'ade label halalnye', kate irfan (pas die liat list daftar menu di meje).

Kalo udeh ke sini, menu favoritnye irfan mie ayam (tapi pas dimakan ayamnye n daun bawangye pade dikeluarin dari mangkok. Die makan mienye doang) n jus jeruk.

Tau nih ye.., die doyan banget mienye, tapi ayam, daun bawang, plus basonye die kagak doyan. Biasenye sih nanti yang nampung semue ntu adeknye.

Jus jeruk di Mie Ayam tugu eni lumayan enak juge. Mie ayamnye juge lekher. Hargenye juge kagak mahal-mahal amir.

Mo tau lokasinye ?. Mie Ayam Tugu adenye di perempatan Tugu Tanah Baru. Tepatnye di jalan Raye Tanah Baru, Beji, Depok. Pas di perempatan jalan Bungur (yang nembus ke Kukusan ntu). Kadang gue juga kalo abis pulang kerje n perut udeh keroncongan berat suka mampir di situ.

My Little Angel

Raissa Mumtaz, gadis kecil ini selalu jadi inceran abngnye kalo di rumah. Tapi dienye sih asik-asik aje walopun kadang abangnye ntu kalo becande suke kelewatan.

Kalo abangnye kagak ade di rumeh, die suke nyari-nyari n keliatan sedih banget. Abangnye lagi tidur kadang suka digetik mukanye pake (Ooops) sendok, kadang pake tangan.

Anaknye lumayan apik. Kalo liat air berceceran dikit aje di lantai die langsung ambil elap terus dielap tuh ceceran aer.

Kalo abangnye baru selesai mandi, die langsung lari ke loker baju abangnye terus ngambilin baju n celane bauat abangnye, walopun kadang-kadang bajunye ntu nggak sesuai ame kemauan abangnye.

Kalo abangnye sentrap sentrup idungnye karena ingusan, die langsung lari ke loker lagi n ngambilin elap ingus buat abangnye.

Baek banget khan..?.

Sayang, abangye sampe sekarang eni masih suka pelit ame adeknye. Padahal adeknya udeh begitu baek ame die.

Lagu Favorit

Sekarang irfan punye lagu favorit baru. judulnye 'Teman Sejati' yang dinyanyiin ama kelompok Brothers. Karene sering didenger, jadinya lumayan apal juge die ame ini lagu, walaupun kadang banyak syairnye yang kagka nyambung.

Lagunye gini (versi kalo die yang nyanyi),

"Selama ini.., ku mencari-cari, teman yang sejati, untuk menemani perjuangan ini. Bersyukur kini padamu illaahi, teman yang dicari selama ini telah kutemui. Temannya disisik (nah loh koq disisik) perjuangan ini karena diarungi (sampe sni saya gak ngerti maksudnya) bertambah suci (nah loh) garasi illaahi..(nah ini tambah parah. Masa garasi illahi)"

Tapi gue salut ama semangatnye pas nyanyiin ini lagu, walopun secare syair banyak nyang ngaco. Saking senengnye die ame eni lagu, tiap kali di jalan die lagi bete, bise diobatin ame lagu eni. Tinggal puterin aje eni lagu di henpon terus didengerin ke die, dijamin anteng dah.

Sebelum lagu eni, die perneh juge seneng ame lagu 'Ibuku' yang dinyanyiin ame anak-anak grup nadamurni. Die sering banget nyanyiin lagu eni. Tiap kali die teriak-teria nyanyiin lagu eni, Umminye sering protes. Kenape protes..??. Cobe simak syair lagunye " Sewaktu..adzan mendayu-dayu. Ibuku pergi meninggakanku. Perginya takkan kemali lagi. Karena takdir telah menentukan....". Nah loh.

Cup..., Cup.., Cup

Eeeiitt.., kenape si raissa nangis kejer yak..?. Ape die protes soalnye gue pulangnye malem terus neh.

Emang, udeh tige hari ini gue sampe rumah di atas jam sembilan, n prajurit-prajurit udeh pade bobo.

Tanggal 4 kemaren, KRL amburadul gare-gare sinyal rusak di Manggarai. Sampe rumah jam sepuluh malem (sebenernye sih dari sore udeh dapet info singal rusak, tapi terus kejebak pas mo 'ngeliput'
Manggarai).

Tanggal limanye pulang malem, nyelesaiin beberape masalah Laporan Bulanan. Maklum, Laporan Audit tengah tahun belom keluar. Sampe rumah jam sembilanan, udeh pade tidur juge due-duenye. Si raissa sempet bangun juga sebentar tapi terus merem lagi.

Nah semalem gue besuk temen yang dirawat di Tugu Ibu. Dari kantor udeh agak malem. Walhasil jem setengah sepuluh baru sampe rumah. Seperti biase, irfan n Raissa udeh pade pules.

Otomatis ketemuan cuman pagi doang pas mo berangkat kantor. Itu juga cuman ama Raissa doank karena irfan jam enem belom bangun. Kalo Raissa sih bangunnye selalu pagi. Kali die mo lihat gue berangkat kantor dulu yak.

Minum Dulu Ah...

Eiit..,ini bukannye mo mabuk yak. Ini minuman biase n dijamin kagak bikin mabok.

Gimane ye.., abis kalo udeh aus gini suke kalap neh. Kayenye ini botol kurang gede. Sekali sedot aje udeh tinggal dikit tuh.

Gak pape deh, mumpung si abang kagak liat. Kalo die liat pasti minte jatah.

Oiye.., sebenernye sih pengen banget minum kopi neh, tapi gimane ye, Ummi kagak buatin kopi tadi dari rumah, jadi adenye cuman aer putih doank.

Makenye .., Ummi kalo ngajak-ngajak pergi jangan lupe bawa kopimiks donk. Biar kagak ngantuk.

Naik Kereta Nyok...

Bulan Juni kemaren Irfan gue ajak ikutan acarenye KRLmania, kunjungan ke Balai Yasa Manggarai (Tampat semua kereta dipermak), terus ke Operation Centrenya, lalu ke Depo KRL Bukit Duri. Tuh die lagi naek loko jaman jebok yang ade di gerbang Balai Yasa.


Emang ini anak fanatik banget yak ame kerete, apelagi KRL. Tiap hari kayenye yang diomongin kereta terus. Maenan favoritnye kereta-keretaan. Makenye die seneng banget pas gue janjiin mo dibeliin kereta-keretaan yang gede yang ada relnye satu set kalo bise bace.

Pas pulang abis jalan-jalan ame KRLmania kemaren ntu, die seneng banget. Sampe rumeh die angsung cerite-cerite ke Umminye dan temen-temennye. Umminye kebeneran kagak bisa ikutan karene pas ade Raker di sekolahnye.

Ikut Lomba Tujuhbelasan

Tujuhbelasan kemaren si Irfan ikutan lomba. Lomba masang kancing baju. Cepet-cepetan masang kancing.
Alhamdulillah setelah melalui due babak, die berhasil jadi juare, juare kedue. Lumayan, pas malem puncak naik panggung nerime hadieh.
Sebenernye kayenye sih die bise jadi juare satu neh, tapi mungkin agak-agak gugup jadi kagak konsen. Udeh hampir selesai masang kancingnye eh pade copot lagi.

Gadis Berkerudung Merah

Siape neh gadis berkerudung merah yang lagi naek sepeda..?. Mo kuliah mpok..?.

Hehehe.., ini si Raissa yang dipoto pas umur 18 bulan kemaren. Kalao tangannye ude megang gagang depan sepeda kayak gitu, kagak bisa ditarik lagi sebelum ntu sepeda dibawa keliling kampoeng.

Oiye, ini sepeda khusus buat jemput si Irfan pulang sekoleh hari Jumat ame Selase. Di hari-hari ntu umminye irfan kagka bise jempt karene ngajar full ampe sore. Nah yang jemput 'teteh'nye (pembantu, Red) irfan. Kalo jemput gitu si Raissa nangkring di tempat duduk VVIP ntu, di belakang stang.

ke Setu Babakan Nyok....

Setu Babakan ini Kampung Betawi yang ade di deket perbatasan Jakarta-Depok. Lokasinye kalo dari arah Depok lewat Jalan Raya Tanah Baru Lurus aje terus ke arah Jagakarsa. ISTN lurus, Warung Sila lurus lagi sampe ketemu gerbangnye di sebelah kanan.

Di sini ada Setu (danau, Red) yang lumayan luas lengkap dengan bebek air yang bisa disewa buat keliling Setu. Tempat ini (tapatnya lagi bebek air ini) jadi favoritnye si irfan karena sejak bayi ude beberapa kali gue ajak ke situ. Kalo si Raissa mah baru sekali ini diajak ke sono.

Kalao hari Sabtu ame Minggu ini lokasi rame bangt. Rame ame pengunjung juge pedagang. Masuknya kagak bayar koq, palingan bayar parkir aje. Kalo mo naek bebek aer, bayar 7000 perak, bisa naek berempat (dengan catatan anak-anaknya masih balita yak).

Mo beli kerak telor juge di sono banyak. Tinggal pilih aje. Mo duduk-duduk aje di tepi danau sambil liat orang naek bebek air juga bisa, sambil ngadem di bawah pohon.

Tapi ati-ati aje kalo naek bebek aer. Jangan sampe kelewatan bates bendera yang udah dipasangin. Takutnye ntar malah terdampar kagak karuan. Si irfan pas naek malah nanya gini," Emangnya di sini banyak setannya..??."

Irfan n Raissa

Kompak banget ye ini anak dua. Ape tiap hari mereka juge kompak?. Sebenernye sih si Irfan emang sayang banget ame adeknye, walaupun sering juge die galak kalo berebutan sesuatu, bise barang , bise makanan.

Nah adeknya yang walopun statusnya masih bayi plus plus plus ternyata kagak pernah mo ngalah juge ame abangnye. Kalo ade barang atawa makanan yang diambil ame abangnye die langsung ngelawan. Minimal itu mulutnye dibikin lancip terus posisi tangan siap ngegebuk. Kalo udeh kayak gitu biasenye si Abang langsung ngacir.

Oiye.., kalo di depan mereka ini jangan deh cobe-cobe minum kopi. Mo kopi mix, ataupun kopi biase. Tau neh, due-duenya hobby ngopi banget. Kalo gue lagi ngopi langsung deh diserbu sambil bawa cangkir kosong masing-masing. Mane kalo minum kopi pade cepet banget lagi.

Makanan Favoritnye juge same. Same ame babenye juge, yaitu nasgor. Si Raissa walau masih imut tapi maunye makan ndiri. Biasenye die ambil piring terus duduk di lantai sambil ngacak-ngacak nasinye. Kayenye sih banyakan yang tumpeh daripade kemakan. Tapi biarin lah, namenye juge anak-anak. kapan lagi pade mo belajar makan sendiri kalao nggak dari sekarang.

Due-duenye juga ternyate punye hobby yang same, yaitu corat-coret. Corat-coret di tembok, lemari makan, lemari es, dan kadang-kadang kalo kite meleng, si Raissa langsung ambil posisi di depan TV terus corat-coret layarnye.

Irfan sendiri sekarang punye hobby baru, nyetel CD Interaktif di Komputer. Kebeneran kalo pas abis pulang kerje, gue kadang beliin die CD interaktif di alun-alun UKI. Maklum, kalo pulang kerje khan biasenye naik KRL dari Cawang.

Kalo liat si irfn lagi asyik maen komputer gitu, biasenye dari jam setengah sembilan ampe setengah sepuluh malem, si Raissa juga kagak mau ketinggalan. Die langsung bikin aksi panjat kursi terus ikutan pencat- pencet keyboard. Kalo udah gini biasenye abangnye langsung ngamuk-ngamuk. Makenya, daripade kagak konsen gue udeh bilangin kalo mo maen komputer mending tunggu sampe adeknya bobo dulu. Die nurut sih dibilangin begitu. Tapi seringnye die ikutan bobo juge pas adeknye bobo. Adeknya kalo malem bobonye emang rada suseh.

Oiye, si irfan udeh bisa nyalain dan matiin komputer sesuai prosedur. Walaupun die belom bise bace, tapi cepet banget kalo diajarin. Lha semaelm aje umminya kaget pas die buke file video klip yang dari Nokia. Cuman kelemahannye die suke buke window banyak banget, lupe ditutup dulu kalo buka file. Tapi sedikit-sedikit udeh gue ajarin sih dan kayaknye lumayan die bisa ngarti.

Semalem juge gue dapet kabar katenye irfan udeh mulain bise bace sedikit-sedikit. Hhhm.., siap-siap menuhin janji gue neh. Gue pernah janji kalo die bise bace, mo dikasihin maenan kereta yang gede ntu. Lumayan juge sih, die jadi semangat, walaupun gue tau die anaknya kagak pernah nuntut apa-apaan, apelagi minta-minta dibeliin maenan. Die prinsipnye dibeiin syukur, kagak dibeliin paling nanya-nanya doang.

My Little Raissa

Ini die potonye si Raissa pas umur tiga bulan. Barusan gue ngoprek-ngoprek komputer akhirnye nemu juge gambar ini. Waktu bayi dulu (Sekarang bayi plus plus plus, hehehe) pipinye tembem banget. Kalo dipakein kerudung gitu pipinye jadi tambah montoq. Bawaannye pengen ditarik-tarik aje, hehehe.

Mohon maap, ini motonye pake henpon, jadi gak-agak burem gitu. Tapi lumayan lah bise liat ekspresinye pas masih imut dulu.

Irfan n raissa in Action

" Oooiii, ini orang-orang pade kemane ye...?? aye aus neh."

"Waduh.., ini pilem kayaknye asik. Tapi ade emak gue nih, gak enak"

"Halo.., saya irfan. Situ siapa..?

My Kids, Irfan n Raissa

Alhamdulillah..,Ini die blognye si irfan dan Raissa Mumtaz. Barusan padahal gue udeh nulis panjang lebar tentang sejarah mereka berdua, eh ilang. Nanti deh kalo sempet ditulis-tulis lagi.

Si irfan name lengkapnye Muhammad Irfan Arsyad. Lahirnye di hari Jumat, jam 16.30 tanggal 21 Desember 2001. Nah adeknye, namenye Raissa Mumtaz. Lahirnye tanggal 4 Februari 2005 jam 02.30 dini hari, hari Jumat juge. Due-duenye same-same lahir di RS Sumber Bahagia, Depok Timur.

Irfan sekarang udeh sekoleh di TK Cahaya Anande, eh Ananda, di deket-deket rumah. Kalo pergi sekoleh maunye dianter ame umminye pake motor. Pulangnye juge gitu. Walhasil, Umminye jam sebelas siang udeh cabut dari sekolehnye.

Abis jemput irfan, isteri gue nggak balik lagi ke sekolahnye, kecuali di hari Jumat dan Selasa, hari die ngajar seharian penuh. Alhamdulilah lokasi sekolahnye isteri nggak terlalu jauh dari rumeh jadi bise pulang pergi kayak gitu.

Si irfan ude disunat lho. Sunatnye pas die umur 19 bulan dulu di Hermine depok. Sebelum disunat die udeh beberape kali dirawat inap di RS ntu karena kejang demam. Suster2 di sono aje sampe pade kenal ame irfan. Lha irfan lagi, begitu sambutan merekapas irfan masuk ruang rawat inep. Pernah juge irfan dirawat di RS Puri Cinere karene kasus yang same. Waktu ntu dr Huda yang rekomen dirawat di sono biar bisa diEEG dan CT scan. Eh di sono malah ketemuan ame dr Irawan, dr anak yang spesialisnye syaraf. Beiau malah bilang jangan diEEG lah. Ngabis-ngabisin duit aje, katenye. Tapi berhubung neneknye irfan maksa-maksa, akhirnye diEEG juge. Alhamdulillah hasilnya bagus. Kate dr Irawan, yang namenye kejang karena panas demam mah kagak usah kuatir. Biase ntu, katenye. Tapi tetep aje kayaknye gue n isteri kagak bisa tenang kalo pas irfan panas tinggi terus kejang.

Alhamdulillah sih pas abis disunat ntu, dia jadi jarang sakit. Percaye nggak percaye neh. Tapi emang dulu ntu katenye di ujung (maap) burungye si irfan, sering infeksi. Istilahnye Phymosis gitu. Nah buat bersihin ntu, kudu disunat. Die disunatnye di ruang operasi Hermine Depok ame dokter bedah anak. Operasinye setengah jam. Abis disunat eh koq die langsung jalan kaki ke kamar perawatan. Suster-suster aje pade takjub. Gue kalo inget ntu semua jadi suka nangis, eh ketawa sendiri. Sebelum sunat sebenernye kite udeh coba diterapi dulu, karene sejak umur 3 bulanan dr Huda udeh nyaranin agar disunat, tapi kitenye yang kagak tegaan. Sempet juge dikonsul ke dr Aryo, dokter bedah anak di RS Mitra international Jatinegara. Tapi beberapa bulan setelah diterapi ntu si irfan panas kejang lagi.

Si irfan dulu lahirnya termasuk kategori lancar. Masuk ruang bersalin jam 15.30, brojol jam 16.30. Itu juge lamenye karene disuruh ditahan-tahan ame bidannye. Kayaknye ini bidan nunggu dokter dayeng, karena perjanjian awal kite emang lahir ame dokter. Bener aje, jam 16-an dokter Chandra dateng, gak lama kemudian Irfan meluncur ke dunia ini. ALhamdulillah, selamet. Wah bu bu, hebat bener ya senam hamilnya, bisa lancar kayak gini, kate dokter Chandra. Senam hamil apaan, orang udeh ditahan dari tadi nih dok, kate isteri gue dalem hati. Oia, pas dokter baru masuk ruang bersalin gue diminta keluar, jadinye kagak bise liat peristiwa ntu secara live.

Nah Raissa laen lagi. Dia ini agak ruwet proses kelahirannye. Umminye udeh berkali-kali mules tapi kagak ade pembukaan (bukan peresmian yak, hehehe). Akhirnye, pas mulesnye udeh kagak ketahanan, masuklah ke ruang bersalin, sambil terus merintih kesakitan. Gue berdiri di sebelahnye sambil ngusap-ngusap keringetnye. Die pegang tangan gue keras banget. Gak lama dokternye dateng. Namenye dokter Budi. Ntu dokter kayenye lagi Flu dah. Srap srup gitu nahan-nahan ingusnye. Tapi gue salut. Die ini bener=bener dokter berdarah dingin. Sempet bingung sejenak kenape si bayi kagak keluar-keluar padahl udeh mules. Akhirnya diifuslah umminye irfan ini (Induksi, Red). Bener aje.., gak lame kemudian setelah beberapa kali 'ngedorong', akhirnya Raissa berhasil nongol di muke bumi ini dengan selamet. Ahamdulillah. Kebetulan saat ntu gue diijinin tetep di ruang bersalin dampingin isteri, sambil terus megangin die. Jadinye gue bisa liat detik-detik kelahiran my Raissa Mumtaz ini. Sempet dipoto-poto juga seh pake HP, tapi sayang itu HP raib dicopet orang.

Eeeit.., Udah dulu yak. Nanti gue lanjutin lage.